Stúlka

Ég er áfram að vinna í Bókinni um mig og var að klára eina síðu áðan. Hún á reyndar að vera partur af opnu, ætla að gera hinn hlutann seinna en á honum á að vera fæðingarsagan ásamt armbandinu og sjúkrahússpjaldinu mínu...það er að segja ef ég finn það!

Ég notaði orginal myndirnar á þessa síðu, var í vandræðum með að skanna þær inn þannig að þær yrðu nógu góðar þegar ég prentaði þær út. Mér finnst það bara koma flott út, skemmtilegt að hafa þennan hvíta kant umhverfis myndirnar. Ég hef ekki áður notað svona mikið rubon á síðu, fékk þetta rubon að gjöf frá konu á ScrapGoods og mér finnst það bara ferlega flott!

Enn ein síða í bókina um mig!

Að þessu sinni var verkefnið "Mín mesta eftirsjá". Ég er sko búin að klóra mér til blóðs í hausnum yfir þessu verkefni!!! Afhverju? jú, ég hef þá bjargföstu trú að það sé beinlínis mannskemmandi að sitja og naga sig í handarbökin yfir einhverju sem gerðist í fortíðinni! Mér finnst tímanum illa varið í svoleiðis vangaveltur og held að ég hafi bara allt annað að gera ;-) En hvað um það, þetta er skylduverkefni ef maður ætlar að vera með í verðlaunapottinum þannig að ég kláraði þetta....en textinn á síðunni fjallar einmitt um að ég sé ekki eftir neinu, af því ég vel að horfa fram á við.

Ég ákvað að nota gamlar myndir af mér, teknar fyrir utan Hringbrautina fyrir laaaannnga löngu!! Ég er gleraugnalaus á þessum myndum þannig að ég er ekki eldri en 2 ára, en ég veit ekki nákvæmlega hversu gömul ég er á þeim.

5 skemmtilegar æskumimmingar

er loksins tilbúin! Ég var lengi að vesenast með þessa opnu. Var fyrst að hugsa um að hafa myndir á henni og hafa textann falinn á bakvið, en ákvað að það gæti bara verið skemmtilegt að brjóta albúmið upp með svona textaopnu.

Ég var svolítið lengi með textann! Loksins þegar ég náði að dusta rykið af atburðum frá síðustu öld, var ég óstöðvandi og það er skemmst frá því að segja að ef einhverjir hefðu verið í nágrenni við mig þá hefðu hinir sömu efast um toppstykkið, jú know!!

Þarna sat ég, ein með sjálfri mér, skrifaði eins og brjálæðingur....með blýjanti í skrifblokk.....því ekki get ég samið í tölvuna (hm þarf að endurskoða það viðhorf fyrst ég er farin að blogga á tölvu!!) og rak upp rokna hlátur reglulega!! Já, ég skil ekkert í mér að halda að ekkert skemmtilegt hafi gerst í "gamla daga" (fliss)!!

Hér eru svo herlegheitin!

Annars að öðru. Við fórum til læknis í dag með Önju því hún er búin að vera svo ferlega slæm af exeminu undanfarið. Það var ákveðið að leggja hana inn á Húðdeildina í Kópavogi til að ná þessu niður og vonandi komumst við að á mánudaginn. Ég er dauðfegin því greyið sefur svo illa og síðan þegar það er svona kalt og þurrt þá er hún hálfu verri. Þetta tekur vonandi ekki langan tíma, en í fyrra þurftum við að vera í 2 vikur.

Það er spurning um að grafa upp krosssauminn til að taka með......það er ekki víst að það verði vinsælt að leggja undir sig svæðið og skrappa!

Uppáhalds liturinn

Var að klára þessa síðu í BUM verkefninu. Þetta var mjög létt nema að því leiti að það eru svo fáar nothæfar myndir til af mér!!! Hvernig ætli standi á því?? Jú......ég festist ílla á filmu! Á flestum myndum er ég með lokuð augun, að beygla munninn og geifla eða gretta mig LOLOL Ég fann þó þessa mynd sem er tekin á Tenerife síðastliðið sumar. Annars var verkefnið á þessari síðu hver er uppáhalds liturinn......sem er náttúrlega grænn...nema hvað LOL

Bók um mig

Ég er að skrappa ansi skemmtilegt verkefni þessa dagana og væntanlega næstu mánuði alveg fram að áramótum, en það er bók um mig. Við erum nokkrar í þessu, fáum úthlutað verkefnum í hverjum mánuði sem við eigum síðan að leysa. Þau eru mis erfið eins og gengur en ofsalega skemmtileg!

Ég settist niður í dag til að vinna síðuna "5 skemmtilegar æskuminningar" Fyrst var ég alveg lokuð.......minntist þess ekki að neitt hefði gerst fyrir aldamót! Síðan þegar ég fór að hugsa þá fór nú eitt og annað að rifjast upp og svei mér þá ef barnæskan hafi ekki bara runnið upp úr mér þegar ég byrjaði að skrifa! Það varð bara erfitt að velja bara fimm minningar! Þetta var bara reglulega gaman! Ég er ekki búin með síðuna, set hana hingað inn þegar hún er tilbúin, en ég er búin með forsíðuna og "Það sem ég er þakklát fyrir" síðuna. Þær eru hér fyrir neðan.